ശരിരം വിയർക്കുക എന്നത് മനുഷ്യ ശരീരത്തിലെ ഒരു സ്വാഭാവിക പ്രക്രിയയാണ്. വിയർക്കുന്നത് ശരീര താപനില നിയന്ത്രിക്കാനും വിഷ വസ്തുക്കളെ പുറന്തള്ളാനുമെല്ലാം സഹായിക്കും. എന്നാൽ ദുർഗന്ധത്തോടെയുള്ള വിയർപ്പ് ആണെങ്കിലോ? ഒരു വ്യക്തിയുടെ ആത്മവിശ്വാസം തന്നെ തകർത്ത് കളയുന്ന ഒന്നാണ് ഇത്. പെർഫ്യൂം ഉപയോഗിച്ച് വിയർപ്പ് നാറ്റത്തെ പ്രതിരോധിക്കുകയാണ് മിക്ക ആളുകളും ചെയ്യുന്നത്. എന്നാൽ ഇതും പലർക്കും വേണ്ടത്ര ഫലം ചെയ്യാറില്ല. അതുകൊണ്ട് തന്നെ ശരീര ദുർഗന്ധം അകറ്റാൻ സഹായിക്കുന്ന പൊടിക്കൈകൾ എന്തൊക്കെയാണെന്ന് പരിശോധിക്കാം.
വിനാഗിരി :- ഒരു കോട്ടൺ പഞ്ഞി എടുത്ത് വിയർക്കാൻ സാധ്യതയുള്ള സ്ഥലങ്ങളിൽ അൽപം വിനാഗിരി (സാധാരണ വിനാഗിരി, ആപ്പിൾ സിഡർ വിനാഗിരി ഏതെങ്കിലും ഒന്ന് ) പുരട്ടുക. വിനാഗിരി നേരിട്ട് പുരട്ടുന്നത് ചർമ്മത്തിൽ പൊള്ളലേൽക്കാൻ കാരണമായേക്കാം. വിനാഗിരി അല്പം വെള്ളത്തിൽ ലയിപ്പിച്ച ശേഷം ചർമ്മത്തിൽ ഉപയോഗിക്കാം. വിനാഗിരി ചർമ്മത്തിന്റെ പിഎച്ച് സന്തുലിതമാക്കാനും ദുർഗന്ധം ഉണ്ടാക്കുന്ന എല്ലാ ബാക്ടീരിയകളെയും നശിപ്പിക്കാനും സഹായിക്കുന്നു.
നാരങ്ങ :- വിനാഗിരി പോലെ തന്നെ, നാരങ്ങയും ചർമ്മത്തിന്റെ പിഎച്ച് സന്തുലിതമാക്കാൻ മികച്ച രീതിയിൽ പ്രവർത്തിക്കുന്നു. നാരങ്ങ രണ്ടായി മുറിച്ചു കക്ഷത്തിൽ പുരട്ടാം. ഇത് കൂടാതെ കക്ഷത്തിൽ പുരട്ടാൻ ഒരു പേസ്റ്റ് തയ്യാറാക്കാം. ഇതിനായി 2 ടേബിൾ സ്പൂൺ കോൺസ്റ്റാർച്ചും നാരങ്ങാനീരും ചേർക്കാം. ഇത് ഏതങ്കിലും ഒന്ന് കക്ഷത്തിൽ പുരട്ടി 10 മിനിറ്റിനു ശേഷം വൃത്തിയായി കഴുകുക.
ഗ്രീൻ ടീ :- ഒരു പാത്രത്തിൽ വെള്ളം എടുത്ത് തിളപ്പിക്കുക, തുടർന്ന് കുറച്ച് ഗ്രീൻ ടീ ചേർക്കുക. ഇത് തണുത്തുകഴിഞ്ഞാൽ, ഒരു കോട്ടൺ പഞ്ഞി ഈ മിശ്രിതത്തിൽ മുക്കി നിങ്ങളുടെ വിയർപ്പ് ഉണ്ടാവാൻ സാധ്യതയുള്ള സ്ഥലങ്ങളിൽ പുരട്ടുക. ശരീര ദുർഗന്ധം അകറ്റാൻ ഈ വിദ്യ സഹായിക്കും.
തക്കാളി :- ഫ്രഷ് ആയി പിഴിഞ്ഞെടുത്ത തക്കാളി നീര് കുളിക്കാനുള്ള വെള്ളത്തിൽ കലർത്തുക. ഇത് ഉപയോഗിച്ച് കുളിക്കുക അല്ലെങ്കിൽ 20-30 മിനിറ്റ് അതിൽ കൈകാലുകൾ മുക്കിവയ്ക്കുക. ഇതിലെ ആന്റിസെപ്റ്റിക് ഗുണങ്ങൾ ദുർഗന്ധം ഉണ്ടാക്കുന്ന ബാക്ടീരിയകളെ നശിപ്പിക്കുന്നു.
അപ്പക്കാരം :- അപ്പക്കാരം ഈർപ്പം ആഗിരണം ചെയ്യുകയും ബാക്ടീരിയകളുടെ വളർച്ച കുറയ്ക്കുകയും ചെയ്യുന്നു. നിങ്ങൾക്ക് ഇത് ഒരു ടാൽക്കം പൗഡർ പോലെ ഉപയോഗിക്കാം, നിങ്ങളുടെ കക്ഷത്തിലും കാൽവിരലുകൾക്കിടയിലും വിതറുക. ദുർഗന്ധം വരാതിരിക്കാൻ നിങ്ങളുടെ ഷൂസിൽ ഒരു രാത്രി മുഴുവൻ ഇത് ഇട്ട് വയ്ക്കുക. ചെരുപ്പ് ധരിക്കുന്നതിന് മുമ്പ് അവ കുടഞ്ഞു കളയണം.
KERALA NEWS, MALAYALAM NEWS, LATEST NEWS, KERALA NEWS DAILY UPDATE, SOCIAL, REGIONAL, VIRAL
0 അഭിപ്രായങ്ങള്